DILI – Prokuradór Jerál Repúblika (PJR), José da Costa Ximenes, segunda-feira (20/02/2017) foin lalais ne’e hatoo relatóriu mensál ba Prezidente Repúblika (PR), Taur Matan Ruak, iha Palásiu Prezidensiál Nicolau Lobato.
PJR fó hatene ba xefe Estadu kona-ba atividade sira ne’ebé Ministeriu Públiku (MP) hala’o ona iha fulan-janeiru no fevereiru, inklui ho rezultadu retiru anuál 2016 nian, ne’ebé realiza iha Rejiaun Administrativa Espesiál Oecusse Ambeno (RAEOA) iha loron-20 no 21, fulan-janeiru, ho tema “Konsolida no Promove Justisa ida ne’ebé Efetivu, Efikás no Lais”, nune’e mós kona-ba produtividade majistradu sira-nian durante períodu refere.
Aleinde ida ne’e, PJR informa mós kona-ba preparasaun hosi parte MP ba eleisaun Prezidensiál no Parlamentar ne’ebé sei relaliza iha tinan ida ne’e nia laran.
“Iha retiru anuál MP nian ne’e, ami mós diskuti oin-nusa mak ita bele destaka no prepara-an, karik krime eleitorál sira akontese ita nia majistradu sira prontu hodi fó resposta ida ne’ebé lalais, nune’e mós hala’o konsensializasaun jurídika ho PNTL atu oinsá bele prevensaun ba krime sira ne’e”, hateten PJR.
Analiza ba dadus situasaun kriminalidade tinan-2016 ninian, PJR subliña katak área balun rejistu kazu barak no, ho ida ne’e, MP planu atu hala’o konsensializasaun jurídika hanesan meius prevensaun ida ba komunidade sira ne’e.
“Iha Munisípiu Dili, Postu Administrativu Dom Aleixo iha prosesu besik 1,000 mak entrada, ho ida ne’e halo ami preokupa, nune’e mós iha Oecusse, ami identifika katak iha Pante Makasar mak iha kazu barak, iha área Suai parte ne’ebé ami identifika ho rejistu kazu barak mak Maliana, Loes no Bobonaro. Haree ba ida ne’e mak ami mós halo aposta hodi halo konsensializasaun ba populasaun sira, liu-liu iha área sira ne’ebé númeru kriminalidade aas, hodi bele atuasaun ba prevensaun kriminalidade, tanba uluk ita nia prosesu pendente barak no ita nia objetivu prinsipál mak redusaun ba pendente sira ne’e, maibé agora tanba ita konsege duni redus pendente portantu ita bele mós dedika-an ba prevensaun”, relata PJR. (Media PJR)