Dili-Sesta, loron-07, fulan-Janeiru, tinan-2021, Prokuradór-Jerál Repúblika Dr. José da Costa Ximenes, informa ba PM kona-ba servisu Kontensiozu Estadu.

Iha enkontru ne’e, PJR hato’o ninia komprimentu ba Primeiru-Ministru Taur Matak ruak ba tinan foun 2021.  Segundu kestaun ko’alia oituan kona-ba Lei Sibernetiku ne’ebé iha loron-4 fulan-Janeiru MP haruka tiha ona ba Ministériu Justisa, porvolta  hamutuk 34 artigu, lei ida-ne’e mós bele ajusta ho Kodígu Penál no Kodígu Prosesu Penál, hodi bele aprezenta ba Konsellu Ministru hodi diskute no aprova.

Nune’e mós PJR informa ba PM kona-ba funsionamentu Servisu Kontensiozu Estadu nian ne’ebé mak konsege rejista prosesu hamutuk 188, no Estadu sai hanesan parte autór iha prosesu sira ne’e.

PJR husu ba Primeiru-Ministru atu governu bele haree didi’ak iha área Servisu Kontensiozu Estadu nian, nune’e, bele reforsa MP ninia pozisaun bainhira defende Estadu ninia interese iha Tribunál. Governu tenke koopera ho MP atu fó prova dokumentu sira hodi suporta no bele defende Estadu ninia interese, dalaruma ita ko’alia ne’e simples maibé bainhira defende Estadu ninia interese ne’e ita tenke iha koordenasaun ne’ebé di’ak liu, tanba ne’e mak ami husu Governu atu kontinua ninia esforsu bainhira iha pedidu ruma tama  iha instituisaun Estadu nian, bele fó informasaun didi’ak no kompletu kona-ba dokumentu sira ne’ebé bele reforsa nafatin servisu MP ninian, nune’e labele lakon iha Tribunál.

PJR hato’o mós katak instituisaun ne’ebé mak barakliu kontra Estadu mak Ministériu Finansas hosi parte reseitas nian, iha mós Ministériu Justisa parte Diresaun Nasionál Terras no Propriedade no Servisu Kadastrais, no kazu sira ne’e maioria  afavór ba Estadu,  maibé ituan mak ita lakon tanba estadu laiha razaun, ho ida-ne’e mák ami husu ba PM atu fó apoiu ba Servisu Kontensiozu Estadu nian ne’ebé mak defende direitu Estadu nian iha Tribunál.

Iha sorin seluk, Primeiru-Ministru  hato’o katak sei halo esforsu makaas no sei kria koordenasaun ida ne’ebé di’ak no integradu ho Prokuradoria-Jerál Repúblika. (Media MP)