Aileu-Segunda, loron-22, fulan-Abril, tinan-2024, Prokuradór Jerál Repúblika (PJR), Dr. Alfonso Lopez, halo abertura ba formasaun Alterasaun Lei Kódigu Prosesu Penál, (KPP) foun ba komandante Munisípiu (13) inklui RAEOA, no investigadór sira PNTL nian husi Unidade Pesoál Vulneravél (VPU), formasaun ne’e hala’o iha sentru formasaun PNTL Aileu.
Iha abertura ne’e PJR hateten, formasaun importante tebes liuliu ba Polísia Investigasaun Kriminál nian hodi fó seguransa ba ita nia estadu no fó protesaun ba ita nia sidadaun sira.
Tanba ne’e ita nia Lei Kódigu Prosesu Penál foun ne’e ita hotu presiza koñese Lei ne’e rasik, liuliu ita-nia autoridade judisiária sira hanesan, Juís, Prokuradór, Defensór Públiku no PNTL tenke iha koñesimentu di’ak ba Lei KPP ne’e, hodi ita bele atua prosesu sira ho di’ak, tanba ne’e tenke servisu ho ekipa hodi ita akuza ema ida ho faktus no evidénsia ne’ebé suporta husi polísia investigasaun sira hodi azxuda prokuradór sira nia servisu atu lori prosesu ne’e ba iha Tribunál.
Hafoin eventu ne’e hotu, PJR husik hela mensajen ba formandu sira katak, nu’udár investigadór hanesan forsa ida ba ita-nia prokuradór sira liuliu iha faze investigasaun sira tenke iha kolaborasaun ida ne’ebé mak di’ak nune’e mós sempre iha kontaktu efetivu hodi nune’e labele falla komunikasaun ba malu, atu nune’e ita investiga mós ho kualidade.
Formasaun ne’e partisipa mós husi, Superintendente Xefe Polísia, Arquimino Ramos, reprezenta komando PNTL, no formasaun ne’e rasik hetan apoiu no finansia husi UNDP, KOICA no Plan Internasionál. (Media PJR)