DILI-iha loron-25, fulan-Fevereiru, Tinan-2021, Prokuradór Jerál Repúblika (PJR), Dr. José da Costa Ximenes hato’o servisu Ministériu Públiku (MP) nian ba Prezidenti Parlamentu Nasionál (PPN), Aniceito Guterres, iha uma Fukun Parlamentu Nasional.
Iha enkontru ne’e, PJR hato’o ba PPN katak, agora daudauk Ministériu Públiku halo hela obra ba konstrusaun Prokuradoria Repúblika ida iha Lospalos, ne’ebé tama iha juridisaun Baucau nian, orsamentu hodi halo konstrusaun ba edifísiu refere no rezidénsia rua ba majistradu no ofisiál justisa nian ne’e ho montante hamutuk $710,074.64.
Iha biban ne’e, PJR konvida Prezidenti Parlamentu Nasionál (PPN) atubele inagura edifÍsiu Prokuradoria Repúblika Distritu Lautém – Lospalos. Konstrusaun refere atinji ona 50% no besik termina ona iha fulan-Abril nia laran, nune’e, ita bele halo inagurasaun.
Ita hatene katak iha tinan barak nia laran, maluk sira husi Tutuala, Luro, Iliomar, tenki hakat to’o Baucau hodi bele hetan prosesu julgamentu. Entaun Prokuradoria Jerál iha hanoin ida hodi konstrui tan Prokuradoria Repúblika Distritu Lautém, obra ne’e hala’o iha fulan-Setembru, tinan-2020.
Aleinde ne’e, PJR informa katak tinan-tinan Prokuradoria Jerál Repúblika aprezenta informasaun anuál ba PPN, no molok kompleta mandatu tinan 4 iha tinan ida-ne’e sei prepara ajenda ida ba fulan abril nian hodi aprezenta informasaun anuál. (Media PJR)