OECUSSE – Prokuradór-Jerál Repúblika, José da Costa Ximenes, kinta (19/01/2017) hala’o vizita ida ba Orfanatu Topu Honis, iha Mahata, hodi kontinua fó tulun ba labarik no joven sira na’in 47 ne’ebé hamahan iha ne’ebá. Durante vizita ne’e, PJR ho nia komitiva fó tulun nesesidade lor-loron nian balun, aleinde entrega mós fotografia ne’ebé fó sai hamutuk iha fatin refere iha fulan-juñu, tinan-2016 liu ba.
Hafoin simu hosi oan kiak sira tuir kultura tara tais, PJR tatoli hela liamenon balun ba sira atu kontinua esforsu aan nafatin atu estuda atu bele sai ema ne’ebé matenek iha futuru hodi kontribui ba sira nia komunidade no ba nasaun.
“Ohin ami mai vizita tan imi la’ós foin dahuluk maibé bebeik ona, ami mai atu fó nafatin motivasaun no enkoraja nafatin imi atu badinas ba eskola no estuda, tanba futuru rai ketan Oecusse iha imi nia liman, tanba ne’e komesa agora tenke estuda”.
Iha fatin hanesan, Prokuradór Repúblika Distritál Oecusse, Mateus Nessi, kontinua fó mos nia korajen ba oan kiak sira atu hakaas nafatin hodi servisu, estuda no eskola.
Emanuel Elu, hanesan reprezentante ba labarik no joven sira ne’e, hatoo agradese boot ba vizita ne’ebé hala’o hosi PJR ho nia komitiva.
“Sua Exelénsia PJR la’ós foin mak vizita ami ne’e, maibé bebeik ona sempre mai vizita ami no lori sasan sira hanesan ne’e, nune’e mós sempre fó nafatin korajen no motivasaun mai ami kona-ba eskola nian, tanba ne’e ami konsidera PJR ne’e hanesan ami nia inan aman tiha ona, ami kontente tebes” hatete Emanuel Elu. (Media PJR)