Dili; loron-18, fulan-Setembru, tinan-2023, Prokuradór Jerál Repúblika (PJR), Dr. Alfonso Lopez, akompaña hosi, Adjunta-PJR sira hanesan, Dra. Angelina Joanina Saldanha, Dr. Jacinto Babo Soares no Dr. Nelson de Carvalho, partisipa iha serimónia abertura ba kursu dahaat formasaun Juíz no kursu daruak formasaun prokuradór Timoroan.
Formasaun ne’ebé sei realiza iha Sentru Estudu Judisiáriu, Lisboa-Portugal ne’e sei hahú hosi loron-21, fulan-Setembru to’o loron-21, fulan-Dezembru, tinan-2023, nune’e mós formasaun refere hetan apoiu finanseiru hosi Uniaun Europeia iha Timor-Leste liu hosi programa Jere Osan Povu Nian ho Di’ak.
Iha diskursu PJR nian hatete katak, “hakarak fó liafuan agradesimentu ba Koordenadora Jerál PFMO tanba fasilita tan formasaun ida ne’e ba MP, kapasitasaun rekursu umanu nudár fundamentál hodi hadi’a kualidade resposta ba kualker instituisaun, nune’e bele hadi’a mós kualidade intervensaun MP nian hodi kontribui ba justisa ida ne’ebé di’ak liu tan iha future,nu’udár dezafiu permanente ida MP nian no oinsá atu alkansa mehi ida ne’e sei aposta ho forma determinadu iha kapasitasaun téknika majistradu sira nian ”.
PJR iha esperansa katak, koñesimentu sira ne’ebé hetan ona durante fulan balu nia laran tuir formasaun, ikusmai majistradu sira sei uza loloos ba atividade professional, tanba kursu ne’e hala’o iha Portugal, entaun nia sei iha dupla vantajen, sei permite koñesimentu konaba esperiénsia Justisa Portugeza nian, no husi sorin seluk aperfeisoamentu ba língua Portugeza, tantu iha dimensaun eskrita ka orál, tenik PJR.
Iha serimónia abertura ne’e partisipa husi formandu sira ne’ebé sei aranka ba Portugal iha loron-19, fulan-Setembru, tinan-2023 ne’e mak hanesan hosi Tribunál, Juís nain haat no hosi MP, Prokuradór nain lima, nune’e mós serimónia ne’e realiza iha Sentru Kulturál Jorge Sampaio, Embaixada Portugal.
Husik tiha iha Embaxada Portugal, formandu sira hosi MP nian kompostu hosi Prokuradór Repúblika na’in lima ne’e, molok aranka ba Portugal, sira sei hasoru malu ho PJR iha Prokuradoria Jerál Repúblika-Colmera, (Media MP).