Likisá-Kinta, loron-15, fulan-jullu, tinan-2021, Prokuradór Jerál Repúblika Dr. Alfonso Lopez partisipa iha diskusaun kona-ba Lei ba Protesaun Labarik no Foin-sa’e sira.
Audiénsia Públika ne’e realiza hosi Parlamentu Nasionál liuhosi Komisaun F ne’ebé trata Asuntu Saúde, Seguransa Sosiál, no Igualidade Jeneru. Objetivu hosi audiénsia ne’e mak atu konsulta ho entidade rua hanesan, Ministériu Públiku no Defensoria Públika hodi rona sira opiniaun kona-ba lei ne’e rasik.
Iha biban ne’ebá, PJR hateten katak haree ba legalidade lei nian ne’e, no mós nu’udar majistradu ida sira so kumpri de’it lei, maibé iha lei ne’e rasik presiza haree didi’ak artigu por artigu nune’e bele kondis ho situasaun ita-nia rai-laran.
PJR akresenta liután katak, sente orgullu tanba hetan konvite hosi Komisaun F – Parlamentu Nasionál hodi bele partilla informasaun no fó mós hanoin kona-ba Lei ba Protesaun ba Labarik no Foinsa’e sira. Povu hein kleur ona Lei ne’e hodi defende labarik sira-nia direitu, haree hosi kuadru legais lei nian, ida-ne’e haktuir ho ita-nia Konstituisaun RDTL, iha art.18, ne’ebé, ko’alia kona-ba Protesaun ba labarik-oan sira, no art. 19 ne’ebé ko’alia kona-ba foin-sa’e sira, inklui sira-nia direitu no dever ne’ebé konsagra ona iha Kontituisaun RDTL nian. Aleinde ne’e, iha konstituisaun RDTL ne’e rasik, iha Kapítulu II, art. 132, ko’alia kona-ba Knaar no Estatutu nian, ne’ebé, sita iha no 1 katak, Ministériu-Públiku reprezenta Estadu, hala’o asaun penál, hametin defeza ba labarik sira, ema ne’ebé laiha, no inkapasitadu sira, defende legalidade demokrátiku no promove banati tuir lei.
PJR mós hatutan liután katak, ita ko’alia kona-ba direitu ba labarik sira nian, bainhira ida-ne’e envolve menór ka labarik sira iha aktu kriminal ruma, entaun, iha ita-nia kódigu penál iha art. 20 dehan inimputabilidade tanba razaun otas, ne’e dehan katak bainhira labarik sira ho idade 16 ba kraik, ne’e inimputavel labele kondena no labele kastigu, no mós labele akuza, tanba ne’e mak iha parte rua, ne’ebé, MP tenki sujere katak, loos duni sira iha direitu maibé sira mós tenki iha responsabilidade kriminál, nune’e, nia bele responsabiliza ba aktu kriminal ne’ebé nia halo. Aleinde ne’e, ita tenki ta’u lei espesiál ida no ta’u iha prizaun ida ne’ebé adekuadu hanesan fatin ba reabilitasaun ninia edukasaun no formasaun ida ne’ebé di’ak ho étika, morál no relijiaun, atu nune’e sira mós bele sai joven ida bé di’ak ba ita-nia país.
Diskusaun refere hetan partisipasaun másimu hosi deputadu sira no diriji ba diskusaun refere hosi Prezidente Komisaun F, Noé da Silva Ximenes “Buka Tuir” mak (Media MP).