Dili – Prokurador-Jerál Repúblika (PJR), Dr. José da Costa Ximenes, hateten katak presiza iha Lei ida kona-ba Rekuperasaun Ativus hodi nune’e bele fan tiha sasan krime sira ne’ebé tahan hosi Ministeriu Públiku (MP). Deklarasaun ne’e PJR fó sai hafoin remata enkontru ho Prezidenti Taur Matan Ruak iha Palásiu Prezidensiál Nicolau Lobato, Tersa-feira (08/11/16).
“Ohin informa ba Prezidenti kona-ba kestaun sasan krime nian ne’ebé tahan hosi MP, tanba sasan hirak ne’e agora ita tenke rai paradu hela ne’e enkuantu investigasaun la’o no to’o rezultadu sentensa fó sai hosi Tribunál. Agora daudaun, purezemplu, ita iha kareta neen ne’ebé MP halo apreensaun iha Maliana, no kareta hirak ne’e ho kondisaun komesa aat no halo ita preokupa tebes. Iha tan ró ida iha Portu Tibar ne’ebé tahan tanba laiha lisensa ho mina tonelada 100 iha ró ne’e nia laran no agora sei iha prosesu investigasaun nia laran, no mina tonelada 80 mak tahan hosi MP mós. Sasan hirak ne’ebé bele estraga ita presiza antesipa fan tiha tanba bele aat hotu, ho ida ne’e mak iha 2014 ami haruka tiha ona karta proposta ida ba Governu atu aprova Lei kona-ba Rekuperasaun Ativus tanba ida ne’e ami hanoin importante tebes, lakleur iha tempu badak ami sei diskute kona-ba Lei Rekuperasaun Ativus ne’e para sasan sira ne’e ita fan antes”, informa PJR.PJR mós hatutan tan katak bainhira Lei Rekuperasaun Ativus aprova ona sei hariii gabineti ida hanaran Rekuperasaun Ativus iha Prokuradoria Jerál Repúblika.
“Kuandu Lei Rekuperasaun Ativus ne’e aprova ona, ita rekomenda para harii Gabineti Rekuperasaun Ativus no iha mós Gabineti Rekuperasaun ne’e halo administrasaun no tau matan ba bens, maibé agora ita seidauk iha no ita la iha instituisaun ida tau matan ba administrasaun bens, se nia valor tun ka kareta sira komesa aat ne’e oinsá ita bele hadia sasan sira ne’ebé ita apreende, ró aat oinsá ita bele hadia, tanba ida ne’e mak iha solusaun mós ba proposta ida ne’e mak ita antesipa fan tiha, tanba iha Suai kareta fuju boot ida ita prende husu ba Tribunál sira atu fan tiha tanba sembaku sira iha laran no agora Tribunál sira la aprova halo sasan hirak ne’e prazu hotu ona ne’e estraga de’it”, tenik PJR.
PJR informa mós ba Prezidente Repúblika katak, iha tinan 2017, Timór-Leste sei sai uma na’in ba Enkontru Anuál Prokuradór-Jerál Repúblika sira hosi Komunidade País Lian Portugés (akrónimu hosi portugés, CPLP), no agora sei diskute hela atu prepara ba evento ne’e. Enkontru anuál ida ne’e, ne’ebé realiza ninia edisaun XIV iha Portugal iha fulan outubru foin lalais ne’e, sei la’o iha Timór-Leste ba dahuluk. (Média PJR)