Dili-Loron-25. Fulan-Maiu, tinan-2021, Prokuradór-Jerál Repúblika (PJR), Dr. Alfonso Lopes, ne’ebé foin simu pose husi Prezidenti Repúblika nu’udar Prokuradór-Jerál Repúblika iha loron-29, fulan-Abril, tinan-2021, hato’o relatóriu mensál ba dahuluk nian ba Prezidente Repúblika, Dr. Francisco Guterres “Lu-Ólo” iha Palásiu Prezidente, Nicolau dos Reis Lobato Bairupite.
Iha biban ne’e, PJR relata ba PR kona-ba servisu administrativu nian nune’e mós ho prosesu ne’ebé agora dadaun lao hela, “ida ne’e hanesan primeiru aktu mai reuniaun ho Prezidente Repúbilka, Dr. Francisco Guterres “Lu-Ólo”, hafoin simu tiha posse. Entaun PJR fó kumprimenta instituisaun relevante sira liu hosi karta iha nivél nasionál no mós prokuradór sira iha distritais, nune’e mós komprimentu liu hosi karta ofisiál ba parsereu sira liu-liu Prokuradór-Jerál Repúblika sira CPLP nian, tanba antes ne’e estabelese ona akordu kooperasaun bilaterais, nune’e ita mantein lasu amizade ho parseiru sira ne’e.”
PJR informa mós kona-ba ninia servisu iha semana dala uluk nian mak hanesan, “, PJR husu ba diresaun no kargu xefeia sira atu relata mai PJR kona-ba pontu dezempeñu no tarefa funsaun sira, ho ida ne’e PJR bele hatene no pondera hodi deside liu-liu ba rekursu umanu, finansieru no materia sira nune’e mós hare kona-ba ejekusaun orsamentu jerál nian, tanba iha orsamentu balun ne’ebé seidauk ejekuta ka pendensia hela’.
Iha biban ne’e PJR relata mós kona-ba progresu konstrusaun edifísiu Gabinete Sentral Kombate Korrupsaun no Kriminalidade Organizada, edifísiu Prokuradoria Repúblika Distritu Lautem no rezidénsia ba Prokuradór no ofisiál justisa sira ne’ebé mak sei remata iha tinan ida ne’e nia laran. (Media PJR)