Díli-
iha loron-10, fulan-abril, tinan-2019, Prokuradór-Jerál Repúlika (PJR), Dr.
José da Costa Ximenes, relata situasaun kriminalidade no atividade formasaun judisiáriu ne’ebé akontese iha
fulan-Marsu nia laran ba Prezidente Repúblika (PR), Dr. Francisco Guterres
Lu-Olo, iha Palásiu Prezidensiál Bairro-Pite.
Iha biban ne’e, PJR informa katak atividade no situasaun
kriminilidade sira ne’ebé akontese iha fulan-Marsu nia laran mak hanesan; Ministériu
Públiku (MP) realiza mini-formasaun ba sekretária ho eskrivaun-de-direitu sira
ne’ebé hala’o durante semana tolu nia laran no termina iha loron-05, fulan-Abril,
tinan-2019. Iha fain hanesan, PJR informa mós kona-ba kazu kontentór sia, sasán
báziku droga nian ne’ebé akuza tiha ona no haruka ba Tribunál Distritál Dili (TDD)
hodi desidi data julgamentu.
Aléinde ne’e iha loron-30, fulan-Marsu, MP hamutuk ho
PNTL, kaer sidadaun timoroan ida, ho sasán báziku droga nian, hamutuk kilograma
250 no kokain grama 160.
Kona-ba kazu tranzasaun, MP akuza ona ema nain sia, prosesu
ida-ne’e, nia valór prezuíju hamutuk dólar amerikanu Rihun sianulu-resin-tolu (93
mil dólares amerikanu), balun tama prizaun preventiva no balun iha hela
aprezentasaun periódiku.
Iha biban ne’e PJR mós informa kona-ba kazu Omisídiu iha
Zumalai, “ mak hanesan kazu Administradór Munisípiu Zumalai nian ne’ebé ita
konsege kaer ona suspeitu ida no agora iha hela prizaun preventiva no sira
seluk ita sei buka tuir nune’e mós sira ne’ebé oho sidadaun Xineza ida iha Bairro-Pite
agora sira hotu iha ona prizaun preventiva.
PJR informa mós kona-ba projetu estatutu foun MP nian ba PR katak “projetu foun estatutu MP nian ita hahú debate iha loron-01, fulan-Marsu, tinan-2019, ita halo konsulta ho sosiedade sivil, husu sira nia hanoin no opiniaun no iha loron-15, fulan-Marsu, tinan-2019, halo reuniaun ho kuadru MP nian hodi husu kolega sira nia ideia no sujestaun”.
Nune’e mós PJR relata kona-ba atividade Workshop no Semináriu
Internasionál ne’ebé MP realiza durante loron rua, hahú hosi loron-04 to’o
loron-5, fulan-Abril tinan-2019 iha Ótel Timor kona-ba MP pasadu, prezente no futuru,
no preokupasaun Prokuradoria Jerál Repúblika nian kona-ba abuzu seksuál ba labarik
sira no defende ema nia direitu.
Iha biban ne’e PJR apela ba Instituisaun Estadu nian, liuliu
SERVE ne’ebe toma responsablidade ba rejistu kompañia sira atu tau atensaun ba
sidadau estranjeiru sira ne’ebé ba rejistu, no mós “aproveita hato’o mensajen
ba públiku liuliu instituisaun sira mak hanesan SERVE, ne’ebé fó sai lisensa
atividade hodi harii kompañia sira tenke ho kuidadu tanba krimi kontentór sia
ne’e, involve timoroan ida ne’ebé ita akuza, nia iha lisensa ba atividade sasán
sira ne’ebé halo ai-moruk ne’e mai hosi liur, maibé hatama tiha sasán sira ne’e,
nia importa fali ba indonesia, ida-ne’e responsablidade kontrolu hosi orgaun
sira hotu, kompañia balun bá halo rejistu iha SERVE dehan katak restaurante,
maibé kalan halo fali atividade ba buti-isin (Massagem), ida-ne’e mak presiza
kontrolu makaas, selae ema aproveita hodi halo atividade kriminál, hatete PJR
ba jornalista sira hafoin ramata reuniaun ho PR. (Media PJR)