Dili-Tersa. loron-06, fulan-Jullu, tinan-2021, Prokuradór-Jerál Repúblika, Dr. Alfonso Lopez hala’o enkontru mensál ho Prezidente Repúblika, Dr. Francisco Guterres “Lú-Olo”,  iha Palásiu Prezidente-Bairu-Pite.

Iha enkontru ne’e, PJR informa ba PR kona-ba situasaun kriminalidade iha Timor-Leste, inklui movimentasaun prosesuál fulan ida-ne’e, hanesan; prosesu pendente hamutuk 2.721,  prosesu entrada iha nivel nasionál hamutuk 448, no prosesu findus totál 396.

Iha sorin seluk, kazu pendente kontinua aumenta ba iha 2.721, ne’e akontese tanba ita-nia governu hakotu ona konfinamentu domisiliáriu, entaun, kazu tenke aumenta tanba ema barak komesa hato’o keixa. Iha fulan-Maiu liubá ita konsege termina kazu hamutuk 253, tuirmai iha fulan-Juñu ita-nia Prokuradór sira servisu makaas hodi termina kazu hamutuk 396. Hosi kazu hirak-ne’ebá, krime ne’ebé domina liu mak krime ofensa korporál, violénsia doméstika, abuzu seksuál ba menór no krime omesídiu balun.

Nune’e mós kona-ba kazu ne’ebé akontese iha Munisípiu Viqueque, fen ko’a laen nia oin lulik  suspeitu tama ona ba prizaun preventiva no vítima lori ona ba iha Ospitál Nasionál Guido Valadares (HNGV)  hodi hala’o tratamentu intensivu. (Media MP)