PJR Viajen ba Portugal Reprezenta Estadu La’ós Pesoál

Dili, loron-20, fulan-Maiu, tinan-2023, Prokuradór Jerál Repúblika (PJR), Dr. Alfonso Lopez hatan ba jornalista sira, ligadu ho notísia ne’ebé publika iha media online Hatutan.com nian iha loron-19, fulan-Maiu, tinan-2023, ho topiku “Deskonfia, PGR Alfonso Lopez ho Nia Asesór Jurídiku Óscar Tavares Uza Osan Estadu Halo “Viajen Privadu” iha Portugal, PJR iha direitu fó resposta katak, viajen hosi Guine-Bisaun ba Portugal ne’e tanba marka ona ajenda durante fulan ida no viajen refere la’ós privadu maibé tanba interese estadu liu-liu iha parte kooperasaun PJR ho Sentru Formasaun Judisiáriu Lisboa nian.

PJR klarifika katak “atu fó hatene ka esklarese kata, tanba ita-nia media balun, ha’u la hatene media ne’e iha ne’e ka laiha, ha’ u atu klarifika horiseik loron-19,  lansa informasaun ba públiku temi  PJR no Ministériu Públiku nia naran, dehan utiliza osan estadu ba viazen privadu ka osan estadu nian ba interse privadu, entaun ha’u atu fó hatene katak PJR ho ekipa ne’e, delegasaun viajen atu tuir vizesimu enkontru Prokuradór Jerál Repúblika-CPLP iha Guine-Bisau, hahu’u iha loron-26 to’o 29, fulan Abril no kontinua ba Lisboa, tanba antes ne’e markadu ona ajenda ho  ita-nia Diretór Sentru Formasaun Judisiáriu Lisboa, ita-boot sira hatene Sentru Judisiáriu internasionál ida ne’e kuñesidu nune’e fó formasaun ba Juís no prokuradór sira, agora dadaun ita nia majistradu nain nain lima mak tuir hela formasaun komplementár iha ne’ebá”. PJR hatete lia hirak ne’e hafoin partisipa iha Aniversáriu Restaurasaun Independénsia 20 de Maiu, iha palasiu Prezidente Bairupite.

PJR esklarese tan katak “prezensa reuniaun iha Portugal, ida ne’e ba dahuluk hasoru malu ho Diretór Sentru Formasaun Judisiáriu Lisboa hodi ko’alia konaba hametin kooperasaun entre instituisaun rua, nuene’e mós iha enkontru ne’e futuramente ita-nia majistradu ka prokuradór sira sei halo formasaun komplimentár kontinua iha Lisboa, hafoin hotu tiha enkontru ne’e, PJR halo enkontru mós prokuradór nain lima  ne’ebé tuir hela formasaun iha ne’ebá nune’e mós formandu sira sente haksolok vizita PJR nian ne’e”.

PJR akresenta tan katak “iha reuniaun ne’e mós prezensa hosi Embaxada Timor-Leste iha Portugal tanba embaxada sira mak fasilita nune’e mós enkontru ho diretór Sentru Judisiáriu ne’e komparese husi ita nia embaxada ho nia elementu segundu sekretáriu, ita-boot sira la fiar ida ne’e, bele konfirma direita ba ita-nia embaixada Timor-Leste iha Lisboa, hodi komfirma sira ne’e mai mai halimar ka”

Iha biban ne’e PJR hatan mós konaba  notisia ne’ebé publika iha media online hatutan.com ho titlu “Estadu Timor-Leste Emite Pasaporte Servisu bá Sidadaun Estranjeiru Ida ho Nasionalidade Caboverdianu, no publika iha loron-27/04/2023, katak, Depois antes ne’e ita nia ekipa ema internasionál uza pasaporte servisu ho antesedénsia PJR haruka pedidu eskrita ba Ministériu Justisa, pois ita nia diretór Jeral Rejístu notariadu mak prosesa, pois ita nia asesór ne’e mós rejístadu iha tinan-2012, nia uza ba ita-nia interse estadu no nia uza bainhira halo servisu estadu nian, fila tenke entrega ba konsellu mak asegura, tamba Lei fó dalan, nune evita PJR la’o tuir koridór lei”.

Iha okaziau ne’e mós PJR husu atu parte hotu lansa informasaun tenki kruza, labele parsiál “Ida ne’e ha’u hare katak falsu, falsu imbutasaun, lansamentu falsu no injuriozu atake, PJR iha dignidade no bom nome, tanba ne’e mak kuandu atu lansa informasaun ba iha públiku kruza labele parsial, hanesan jurnalista ita hotu tenke étika ne’e sempre iha”, (Media PJR).