Díli-Investigadór
sira hosi Polísia Nasionál Timor-Leste (PNTL) hosi Munisipiu 12 hetan formasaun
hosi Dra. Benvinda do Rasario kona-ba Kódigu Prosesu Penál no Prosesu Penál iha
salaun PNTL Akademia Comoro, kuarta-feira, loron-29, fulan-Maiu, tinan-2019,
formasaun ne’e atu hakbiit tan investigadór sira nia koñesimentu kona-ba
prosesu penál nian.
Tuir formadora Dra. Benvinda do Rosario katak, “objetivu hosi formasaun
ne’e atu hametin koordenasaun Ministériu Públiku ho PNTL iha área investigasaun
kriminál, nune’e mós formasaun refere bazeia ba pedidu hosi Inspetór
Costantinho Magno mai iha Prokuradór Distritál Díli, Dr. Jacinto Babo”, hatete
Dra. Benvinda do Rosario hafoin ramata formasaun ba PNTL sira.
Iha formasaun ne’e, formadora esplika kle’an liu kona-ba faze inkéritu iha
área investigasaun nian bazeia ba Kódigu Prosesu Penál ho Kodigu Penál,”
formasaun ne’e ha’u mai esplika liu kona-ba faze inkéretu nian nune’e mós kona-ba
oinsá dezafia difikuldade sira ne’ebé infrenta iha terrenu”, tenik nia.
Iha biban ne’e mós Inspetór Costantinho Magno ne’ebé organiza formasaun
ne’e mós relata tan katak, “ami presiza tebes formasaun hanesan ne’e ba
investigadór sira, tanba tuir Kódigu Prosesu Penál Artigu 57 kona-ba Polísia
hetan delegasaun kompeténsia mai hosi Ministériu Públiku, tanba ne’e tenke hetan
intervensaun hosi MP tanba MP mak nain ba prosesu penál, hateten Inspetór ne’e
ba media-PJR hafoin ramata formasaun.
Nia subliña tan katak, matéria ne’ebé fó hosi Dra. Benvinda do Rosario ne’e
maske tempu mak uitoan de’it maibé bele ona korresponde preokupasaun sira
ne’ebé mai hosi investigadór sira, fiar katak preokupasaun ami-nia ba asaun reál
iha terenu bele korresponde ona nune’e mós ami hetan informasaun lubuk ida atu
ami bele impleta iha ami-nia serbisu ba futuru.
Nia tenik tan katak, formasaun hanesan ne’e la’os mak
hotu iha ne’e deit lae, maibé ba futuru kontinua nafatin atu haforsa liután
investigadór sira, “ami-nia espetativa ba futuru ami sei presiza nafatin
formasaun hanesan ne’e, tanba difikuldade ne’ebé mak investigadór sira hasoru
iha terrenu ne’e MP mak bele fó ausíliu hodi bele korresponde ba difikuldade
sira, (Media MP).