SUAI – Besik tama ba Eleisaun Prezidensiál no Parlamentár, Polísia Nasionál Timor-Leste (PNTL) hosi Munisípio Suai agradese tebes ba Ministériu Públiku (MP) tanba, liu hosi Prokuradoria Repúblika Distritál Suai, bele realiza formasaun ba membru polisía sira kona-ba krime eleitorál.
“Ami hosi PNTL Suai agradese tebes ba MP, liuliu Prokuradór Distritál Suai nian, tanba bele fasilita ona ami nia membru sira tuir formasaun liga liu ba krime eleitorál tanba tinan ida ne’e ita sei hasoru festa boot rua hanesan eleisaun ba prezidente no parlamentár”, dehan Segundu Komandante PNTL Suai, Inácio Amaral, iha salaun formasaun PDS, segunda feira (13/03/2017).
Segundu Komandante ne’e informa liu tan katak hodi hasoru situasaun sira iha terrenu presiza duni formasaun para membru PNTL sira atu ezerse sira nia funsaun no papél hanesan seguransa ho didi’ak, no karik atu halo atuasaun no prevensaun ruma ba krime eleitorál sira bele implementa saida mak sira hetan ona. Inácio Amaral mós husu ba Ministériu Públiku kontinua fó formasaun sira seluk liga ba Lei no prosesu judisiál nian hodi nune’e kazu sira ne’ebé mak Polísia sira autua iha terrrenu ba iha MP bele la’o ho susesu liu tán.
Prokuradór Distritál Suai, Matias Soares, hateten katak PNTL ho MP hanesan parseiru besik liu ne’ebé mak atende sidadaun ka ema nia problema, no agradese ba Komandante Eskuadra Suai ne’e mak koloka nia membru sira hodi mai partisipa iha formasaun ne’e, liuliu ba Ofisiál Polisía Suku (OPS) sira, tanba sira mak ema ne’ebé ba dalahuluk ajente estadu nian liga direita ho sosiedade iha aldeia no suku sira.
Partisipa ba formasaun ne’e ema na’in 47 inklui hosi parte OPS, Unidade Patrulla Fronteira (UPF), Task Force, Investigasaun no Tránzitu sira. (Média PJR)