Viqueque- Komandante PNTL Eskuadra, Ossu, Uatucarbau, Uatulari, Viqueuqe, Lacluta ho Polísia Investigasaun Kriminál, Task Force Polísia Tránzitu no Ofisiál Justisa sira, segunda foin lalais (03/06/2019) hetan formasaun konaba prosedimentus Investigasaun Kriminál krimi bazeia ba Jenéru, hosi Prokuradora Distritál Baucau, Dra. Remiza de Fátima no Prokuradór Distritu Viqueque, Dr. Domingos Gouveia Barreto.

Tuir Dr. Gouveia katak formasaun ne’e ho nia objetivu atu kapasita liutan Autoridade Polísia no Ofisiál Justisa sira-nia koñesementu kona-ba enkuadramentu legal no meius obtensaun ba prova sira, “Ita-nia objetivu prinsipál mak ne’e, kapasitasaun ba autoridade Polísia, ofisiál Justisa sira, ida ne’e importante tebes atu bele iha koñesimentu ba ita-nia ordenamentu jurídiku nasionál, em prinsipiu iha Municípiu Viqueque, komunidade barak mak hato’o keixa diretamente ba Polísia, tanba ne’e importante tebes kapasitasaun ba Polísia sira ho di’ak atu nune’e bele rekolla prova sira ho di’ak hafoin relata autu notisia mai iha Peokuradoria Distritu Viqueque”.

Nia Akresenta tan “formasaun ne’e realiza tanba hetan apoiu finanseiru hosi United Nations Development Programme (UNDP) no iha formasaun ne’e ami foka liu ba, krimi sira ne’ebé mak bazeia ba jéneru, mekanizmu atu asegura no rekolla prova sira, nune’e mós ami fó espasu ba partisipante sira atu husu konaba difikuldade ne’ebé sira enfrenta durante ne’e’, hateten Dr. Gouveia ba Media PJR liu hosi entrevista via Telefone.

Nia solisita tan katak, formasaun hanesan ne’e la’ós pára iha ne’e de’it, lae, maibé kontinua nafatin ba Autoridade PNTL sira, “formasaun ne’e importante tebes, tanba ne’e sempre kontinua ho kualker materia ne’ebé mak ligadu ho ita nia servisu, tanba ita ho Polísia iha ligasaun direta  ba prosesu sira, tanba ne’e presiza mellora di’ak liu tan”.

Nia realsa tan katak, kooperasaun entre MP no PNTL Munisípiu Viqueque durante ne’e la’o di’ak tebes, “Iha ne’e kooperasaun entere PNTL no MP la’o di’ak tebes, tanba kualker dexpaisu ne’ebé maka delega ba sira, sempre kumprimentu ba dexpaisu mesmu iha kestaun balun la kumpri tuir prazu ne’ebé maka determina ba sira.

Entretantu, formasaun hanesan, antes ne’e mós hala’o ona iha Munisísipiu seluk hanesan, Baucau, Lospalos, Manatuto no Viqueque.

Iha fatin hanesan, formandu Pedro Francisco, hanesan mós Komandate Eskuadra  PNTL Postu Administrativu Ossu nian sente katak formasaun ne’e di’ak teb-tebes, tanba ne’e ba futuru presiza nafatin formasaun hanesan ne’e hosi Ministériu Públiku.

“Formasuan ne’e di’ak tebtebes mai ami,  formasuan ne’e realiza tanba koordenasaun di’ak entre ami no Ministériu públiku, tanba ne’e mak ami nia rekomendasaun ba oin presiza treinamentu bebeik, atu nune’e ita labele implementa sala lei sira ba iha atuasaun krimi ruma”, (Media PJR).