Bobonaro-Polísia Investigasaun Kriminál, Ofisial Justisa, Maritima no Unidade Patrollamentu Fronteira (UPF), Munisipíu Bobonaro, Sesta-Feira (31/05/2019) foin lalais ne’e, hetan formasaun hosi Prokuradór Repúblika Distritu Bobonaro, Dr. João Marques, konaba Papél Ministériu Públiku nian no tipu krimi sira ne’ebé akontese iha Munisípiu refere

Iha formasaun ne’e, Prokuradór Repúblika Distritu Bobonaro, Dr. João Marques, esplika klean konaba, Papél Ministériu Públiku nian, Polísia nia papél Jerál konaba keixa, elaborasaun Auto notísia, auto flagarante delitu, auto aprensaun, notísia ba krimi, lei kontra violênsia, krimi arma branka sira, krimi kontra-bandu, meiu-de-prova no mós meiu-de apriensaun ba prova natureza krimi, krimi públiku, semi públiku no mós inkéretu.

Nia hatutan tan katak, “formasaun ne’e mós Prokuradór Repúblika uza linguajen ne’ebé fásil atu partisipante sira kompriende ho di’ak, tanba linguajen jurídiku nian iha termu balun ne’ebé babain ita la ko’alia no la rona, tanba ne’e ha’u fiar katak, liuhusi formasaun ne’e bele mellora, di’ak liu tan sira nia koñesimentu, atu nune’e bainhira sira simu delegasaun kompetensia ruma ita laiha dúvida, nune’e sira bele halo investigasaun klean ba prosesu sira, tenik Prokuradór Repúblika ne’e.  

Nia realsa tan katak, “formasuan ne’e hola parte ba programa anuál Prokuradoria Repúblika Distritu Bobonaro nian, ne’ebé kada tinan sempre hala’o, ita espera katak iha tinan oin mai bele iha kontinuasaun tanba ho kontinuasaun mak bele azuda di’ak liu tan ba ajente sira nia servisu, liuliu ba Polísia Marítima, UPF no mós Polísia Investigasaun Kriminál.

Iha fatin hanesan tuir koamandate PNTL Munisípiu Bobonaro, Superintendente Xefe Polísia, Armando Monteiro, katak “formasaun ida ne’e tinatinan realiza tanba kooperasaun entre Tribunál Distritál Suai no Prokuradór Munisípiu Bobonaro, Komando PNTL Munisípiu Bobonaro no mós forsa apoiu Polisiál ne’ebé mak destakadu iha área jurídiku Munisípiu Bobonaro, ho objetivu atu kapasita no aumenta koñesimentu klean liu tan iha servisu investigasaun kriminál nian, hodi bele halo atendimentu no prosesamentu ita nia kazu saida de’it mak iha ita nia área jurídiku Munisípiu Bobonaro ne’e ho di’ak no fasilita hodi nune’e prosesu sira bele aprezenta tuir prazu no tempu ne’ebe mak lei haruka.  

Entretantu tuir Superintendente Xefe Polisia ne’e katak, durante ne’e kooperasaun entre Komandu PNTL Munisípiu Bobonaro no Prokuradoria Repúblika Distritu Bobonaro la’o di’ak tebes, “tanba durante atendimentu ba ita nia kazu iha Munisípiu Bobonaro la’o di’ak tebes aleinde fó formasaun, ita mós iha kooperasaun di’ak, tanba ita-nia ofisiál investigasaun ida iha Prokuradoria Repúblika Bobonaro, atu oinsá iha kualker kazu ne’ebé mak aprezenta iha prosesuál, buat balun mak seidauk kompleta, liu husi ofisiál ida ne’e ho MP bele aselera no finaliza prosesu tuir ninia data, hatete Superintendente Armando Monteiro.

Iha biban ne’e mós tuir Ajente UPF, Nicolao Polentino, katak “ami presiza tebes formasaun hanesan ne’e, hodi kapasita ami-nia profesionalimu, tanba se laiha formasaun hanesan ne’e, ita laiha koñesimentu ba iha ita-nia atuasaun ba krimi ruma, tanba  dala barak  ita hasoru problema iha ita-nia atuasaun, ida ne’e akontese tanba impaktu husi laiha formasaun, maibé bainhira iha formasaun hanesan ne’e , entaun ida ne’e, bele sai hanesan bukai ida mai ita hodi haforsa ita-nia servisu iha terenu,  hatete ajente UPF ne’e.

Partisipa iha formasaun ne’e hamutuk ema nain haatnulu resin-rua, kompostu husi xefe seksaun investigasaun kriminál hosi Eskuadra hitu iha área jurídiku Munisípiu Bobonaro, Unidade Patrullamentu Fronteira no Unidade Polísia Marítima, (Media PJR).