Dili-loron-14, fulan-Dezembru, tinan-2020, Prokuradór Jerál Repúbika (PJR), Dr. José da Costa Ximenes ho Adjuntu-PJR, Dr. Alfonso Lopes, informa servisu Ministériu Públiku (MP) nian durante fulan-Novembru ba Prezitente Repúblika (PR), Dr. Francisco Guterres Lú-Olo nune’e PR fó apoiu tomak ba MP hodi atua Krime organizada sira.
Iha reuniaun ne’e PJR informa katak “prosesu fulan-Novembru nia laran ita rejista prosesu hamutuk atus lima, sanulu resin tolu (513) iha nivel nasionál, ita konsege finaliza prosesu hamutuk atus lima, ualunulu resin sia (589), nune’e mós iha Gabinete Sentrál Kombate Korrupsaun no Krimenalidade Organizada (GSKKKO), prosesu tama sanulu resin rua (12) no finaliza prosesu ruanulu resin rua (22), la inklui prsesu julgamentu ne’ebé ita halo”.
PJR Informa mós konaba ho nia Adjuntu vizita ba Prokuradoria Distritál sira, “Ha’u mos halo vizita lubuk ida ba Prokuradoria Distritál sira, ha’u-nia Adjuntu mós halo vizita iha fulan-Novembru nia laran, ami haree prosesu balu sai prekupante makas mak falsifikasaun dokumentu veteranu, dadus pesoál veteranu nian, fulan-Novembru ita akuza ema nain-7 iha Munisípiu Bobonaru”.
PJR apela katak “Ha’u so aviza deit sira ne’ebé kostumu halo falsifikasaun hein sira nia tempu, ida ne’e seriu ha’u ba Maliana ho fatin sira seluk balu nunka tama loron ida iha prizaun mais sira tau iha sira nia dadus pesoais ne’e dehan tinan 8 to’o 14 iha prizaun, ida ne’e hatudu inkapasidade komisaun omenajen nian, ha’u hanoin Governu tenke tau atensaun di’ak konaba Lei kombatente libertasaun nian iha artigu balun ne’ebé dehan, ema ne’ebé deklara ka falsifika dokumentu sei lakon nia direitu, husu atu ministériu relevante haree kestaun ne’e ho seriu”.
Iha enkontru ne’e PJR mós informa konaba servisu Kontensiozu Estadu nian ba PR “ha’u informa mós konaba servisu Kontensiozu Estadu nian, liu-liu iha materia ne’ebé estadu hanesan vítima, estadu hanesan autór no iha materia ne’ebé mak estadu hanesan reu, nune’e prosesu ne’ebé agora iha hela tribunál estadu hanesan reu iha kazu 88, iha kazu 13 deit mak estadu hanesan autór, husi kazu ida ne’e barak liu ema halo asaun kontra estadu ba Teras no propriedade”.
Iha biban ne’e mós PJR preokupa ho servisu teras no propriedade nian, “Ha’u preokupa mós konaba Teras no Propriedade, uluk ema book iha tasi tolu, sira hanesan “panas-panas tai ayam” mota laran ho foho leten sira ne’e mós ema ba sukat hotu, ha’u pasa deit mensajem, estadu kuaze atu laiha rai, ema privadu mak atu domina rai estadu, aviza boot ida ba Ministériu Justisa no Sekretário Estadu Terras no Propriedade atu tau matan ba kestaun ne’e”.
Iha okaziaun ne’e mós PJR informa kona-ba kazu omesidiu ida ne’ebé akontese iha Taibesi, “joven ida ne’ebé arguidu oho iha Taibessi, ita hamutuk ho PNTL kaer iha Munisípiu Ermera, Postu Administrativu Atsabe, suku Atara, agora iha ona prizaun preventiva”.
Konaba kazu elit komputer no Telemor nian agora dadaun suspeitu sira iha ona prizaun preventiva, “sira iha hotu ona prizaun preventiva, no responsavél ho inisiál IJOF ita halo rekursu ba iha tribunál, ha’u aviza deit sira seluk ne’ebé fó suporta iha kotuk favor ida di’ak liu tur hakmatek”.
Rona tiha informasaun hirak ne’e, iha pontu-de-vista PR nian fó apoiu tomak ba MP hodi atua krime organizada sira, “ita boot sira hatene Nai Prezidente Repúblika fó suporta total ba MP, dala ida tan hanesan primeiru majestradu iha nasaun ida ne’e, husu favor kualker krime organizadu ita boot sira atua tuir kompeténsia ida ne’ebé importante, imparsiál, independente para garante ita-nia estadu”, (Media MP).