Dili- loron-09, fulan-Fevereiru, tinan-2021, Prokuradór-Jerál Repúblika (PJR), Dr. José da Costa Ximenes ho Adjuntu PJR, Dr. Alfonso Lopez hala’o enkontru mensál ho Prezidente Repúblika (PR), Francisco Guterres Lú-Olo, iha Palásiu Prezidente-Bairu-Pite.
Iha enkontru ida-ne’e, PJR informa ba PR kona-ba situasaun kriminalidade iha Timor-Leste “iha loron-31, fulan-Dezembru, tinan-2020, prosesu hamutuk 2.123, ne’ebé mak pendente iha nivel nasionál hamutuk prosesu 823 no prosesu tama foun iha tinan-2021 iha nivel nasionál hamutuk prosesu 507, ne’ebé, kompostu husi Prokuradoria Distritál sira hanesan; iha Dili prosesu entrada hamutuk 300, Baucau prosesu entrada hamutuk 77, Suai prosesu entrada hamutuk 74 no Oe-cusse prosesu entranda hamutuk 48”.
PJR mós hatutan liután katak, “aproveita informa ba PR, asuntu balun ne’ebé relativamente ho MP nia atuasaun hodi defende estadu ninia interese. Bainhira ko’alia kona-ba defeza ba interese estadu nian, maioria problema ne’ebé ita iha mak hanesan kontratasaun sira, entaun, ita presiza haree didi’ak kontratu sira ne’ebé selebra, nune’e, ita bele proteje estadu ninia interese.
Iha biban ne’e, PJR koa’lia mós kona-ba kooperasaun entre Komisaun Anti-Korrupsaun ho Prokuradór sira iha Gabinete Sentrál Kombate Korrupsaun no Kriminalidade Organizada (GSKKKO) hodi halo formasaun ida kona-ba Lei Anti-Korrupsaun. Formasaun ne’e sei realiza durante semana rua no hetan apoiu husi Uniaun Europeia. Informa mós katak MP asina ona MoU ho PDHJ iha loron-05, fulan-Janeiru, tinan-2021, no iha pontu tolu ne’ebé mak importante; promove defeza ba legalidade demokratika, promove defeza direitu sidadaun sira nian no oinsá promove asaun penál.
Iha sorin seluk, Prezidente Repúblika enkoraja Ministériu Públiku (MP) atu labele haree de’it ba kuantidade maibé mós oinsá atu kontinua reforsa nafatin ninia kualidade intervensaun ba asaun hotu-hotu. (Media PJR)