Dili, Sesta, loron-05, fulan-Novembru, tinan-2021, Prezidente Repúblika, Dr. Francisco Guterres Lú Olo nomeia Dra. Remizia de Fátima da Silva sai Adjunta Prokuradóra Jerál Repúblika, iha Palásiu Prezidensiál Nicolao Lobato Bairupite.
Iha biban tomada-de-posse ne’e, Prezidente Repúblika Francisco Guterres Lú Olo hateten knaar Adjuntu-PJR importante no signifikativu iha Ministériu Públiku.Tuir Estatutu Ministériu Públiku no tuir Konstituisaun hateten katak kompeténsia adjuntu Prokuradór-Jerál Repúblika nian mak koadjuva no substitui Prokuradór-Jerál Repúblika. Tanba ne’e, Adjuntus-PJR de’it mak bele kaer knaar aas ne’ebe iha diresaun Ministériu Públiku nian, no mós knaar sira seluk ne’ebé Prokuradór-Jerál Repúblika bele delega ba sira, tuir lei haruka.
Xefe Estadu louva dezempeñu Remízia de Fátima da Silva ne’ebé hatudu tiha ona iha Ministériu Públiku ho responsabilidade oioin ho esperiénsia serbisu liu tinan rua-nulu. Esperiénsia ne’ebé iha sei hariku knaar ne’ebé sei hala’o. Haree ba Dra. Remizia ninia kapasidade no kualidade profisionál no pesoál, inklui ninia karáter, ha’u fiar katak Dra. Remizia ne’e sei hala’o ninia knaar nu’udar Adjunta Prokuradór-Jerál Repúblika ida ne’ebé ezemplár, ho méritu aas.
Prezidente Repúblika mós enkoraja atu prevensaun no kombate hasoru kriminalidade en-jerál no hasoru korrupsaun no kriminalidade organizada no transnasionál tenke halo beibeik, no ida-ne’e ezije aten-barani no motivasaun rohan-la’ek, la’ós de’it husi ajente sira Ministériu Públiku nian, maibé mós husi instituisaun sira seluk no sidadaun sira nia partisipasaun iha luta ida-ne’e. Atu luta ne’e la’o ba oin ho di’ak no hetan susesu metin kedas, diresaun Ministériu Públiku nian tenke kompetente no efikás liután. Ida-ne’e sei sai responsabilidade sentrál ida ne’ebé Adjunta sei ka’er liuhusi kolaborasaun ho ninia Xefe, Prokuradór-Jerál Repúblika.
Iha tomada-de-posse ne’e, Dra. Remizia de Fatima da Silva hato’o agradesementu ba PR ho forma ne’ebe profundu no respeitozu liu, agradese ba Sua Exelénsia Prezidente Republika ne’ebe deside fó mai ha’u onra atu bele serbi Ministériu Públiku, majistratura ida ne’ebe ha’u dedika ona ha’u-nia vida profisionál tomak no daudaun ne’e iha altu kargu nu’udar Adjunta Prokurador-Jerál Repúblika.
Nia hateten liután katak, iha konxiénsia klaru kona-ba responsabilidade ba kargu ida-ne’e. Tanba ne’e, ha’u hakarak garante ba Exelénsia Prezidente Republika, katak ha’u sei fó buat ne’ebe di’akliu atu kumpre funsaun hirak ne’ebe atribui mai ha’u, hodi bele onra no justifika, liuhusi ezersisiu empefiadu no kualifikadu hosi kargu, konfiansa ne’ebe depozita ona mai ha’u.
Adjunta-PJR mós hateten katak hanesan propriu naran indika, koadjuvante no substitutu Prokuradór-Jerál Repúblika nian, laiha kompeténsia própria. Maibé iha dever legál mak atu kumpre didi’ak funsaun hirak ne’ebe vosa Exelénsia hakarak atribui mai ha’u. Maibé, aleinde impozisaun legál, ha’u hakarak garante ba ItaBoot, liuhusi ha’u-nia palavra-de-onra, katak ha’u sei sai koadjuvante ida ne’ebe leál no sei kumpre ho másimu empeñu atribuisaun hirak ne’ebe sei konfia mai ha’u.
Adjunta ne’e dehan, ema ida labele la’o mesak. Nune’e mós iha, nivel profisionál. Tanba ne’e laiha ema ida mak manan mesak. ha’u fó hakat ida tan iha ha’u-nia karreira profisionál, permite mai ha’u atu hato’o liafuan agradesimentu no omenajen ba ha’u-nia familía, ba sira hotu ne’ebe akompaña ona ha’u iha jornada ida-ne’e no partilla ho ha’u nia felisidade boot ba loron ida ohin. (Media PJR)