DILI, Segunda, loron-06, fulan-junu tinan-2022 Prezidente Republika (PR), Dr. José Manuel Ramos Horta, partisipa iha seremonia aniversariu dala-20 ezisitensia Ministeriu Publiku, hafoin Restaurasaun Independensia, ne’ebe hala’o iha salaun Nobre Ministeriu Negosiu Estrajeiru Kooperasaun (MNEK),
PR hateten papel Ministériu Públiku (MP) nu’udar pilár importante ba justisa no demokrasia iha Timor-Leste, Husu Ministeriu Publiku kontinua atua kazu krimi sira ho profisionál, labele politiza bainhira halo analiza ba kazu abuzu poder sira. Tanba kuandu membru ida hosi Ministeriu Publiku balun maka husik espasu ida ne’e mosu sei hatun kredibilidade no integridade Ministeriu Publiku nian rasik
Prezidente Repúblika mós nota durante ezistensia Ministeriu Publiku iha tinan 20 ne’e enfrenta problema rekursu umanu no fasilidade atu atende kazu sira iha setor justisa nian.
Ministeriu Publiku asume responsabilidade ba defende valór fundamentál Estadu direitu, ne’ebé fó abut iha ba sosiedade, iha reprezentasaun Estadu nian iha Tribunal sira no ezersisiu asaun penál nian defeza ba menór, auzente no inkapazes iha defeza ba legalidade demokratika no promosaun kona-ba kumprimentu ba lei.
PR hatutan liután katak MP hanesan institusaun Estadu ne’ebe hola pilar importante iha setór judisiariu, ne’ebe hala’o asaun penál no ba oin tenke aumenta rekursu umanu kualifikadu nune’e bele fó asistensia judisiál ba povu. Husu mós ba Governu atu buka hakbi’it Ministeriu Publiku liuhosi aumeta rekursu umanu, kria kondisaun hodi mellora di’ak liután serbisu Prokuradór Jerál Republika atu ba oin bele fó asistensia justisa ba povu.
Alende ne’e, Xefe Estadu mós husu ba Ministeriu Publiku atu promove igualidade jeneru tanba numeru feto iha MP menus liu iha posizaun importante sira.
Iha biban ida ne’e Prezidente Parlamentu Nasional, Deputadu Aniceto Longuinhos Guterres Lopes, hato’o kongratulasaun ba MP nia ezistensia ba tinan dala-20 hafoin Restaurasaun Independesia.
Prezidente Parlamentu mós Husu nafatin Prokuradór Jerál Republika kontinua hatudu dezempefiu di’ak hodi atende kazu krime iha rai laran no krime transnasionál sira.
Prezidente Parlamentu kompromete kontinua apoia MP liuhosu lejizlasaun sira ne’ebé sei menus atubele fasilita serbisu hodi atende kazu krime sira.
Nune’e mós Prezidente Tribunal Rekursu (PTR), Dr. Deolindo dos Santos, dehan maske MP ho Tribunal Rekursu hasoru dezafiu barak, maibe la hamate Espiritu hodi garante justisa ba sidadaun hotu.
Prezidente Tribunal Rekursu mós hateten katak, Rekursu umanu no fasilidade ne’ebé limitadu ne’e la sai dezafiu, maibe kontinua maka enkoraja ita hodi kontinua hakat hodi povu bele sente justisa Tanba iha difikuldade, maibe Ministeriu Publiku hatudu ona progresu balun no bele lori justisa besik liu povu.
Entretantu, Prokuradór Jeral Republika (PJR), Alfonso Lopez, rekoñese durante ezistensia Ministeriu Publiku ba tinan 20 hafoin Restaurasaun Independensia hasoru difikuldade barak hanesan menus rekursu umanu no fasilidade. ita hahu harii instituisaun ho hakbi’it ne’ebe iha, maibe konsege alarga ka instala edifisiu Ministeriu Publiku iha Ermera, Viqueque, Maliana, Lospalus no Munisipiu sira seluk no konsege harii Gabinete Kombate Korrupsaun atu lori justisa hakbesik ba povu no defende direitu povu nian
Daudaun ne’e, totál numeru Prokudarór na’in-37, nune’e presiza halo rekrutamentu atubele mellora atendimentu ba kazu krime no sivil sira iha Timor-Leste. Media (PJR)