Dili- Kuarta, loron-27, fulan-Outubru, tinan-2021 Prezidente Repúblika Dr. Francisco Guterres Lú Olo (PR) Inagura edifisiu foun ba Gabinete Sentrál Kombate Korrupsaun no Kriminalidade Organizada (GSKKKO), iha Prokuradoria Jerál Repúbika, Colmera, Dili.
Prezidente Repúblika apela ba instituisaun no ajente sira atu kontinua nafatin luta ba prevensaun no kombate kriminalidade ho motivasaun ne’ebé aas no empeñadu, hasa’e kapasidade no espesialidade ne’ebé la’o ho forma ida kualifikadu, artikuladu, efikás no forte hodi hasoru krime. Ministériu Públiku iha knaar konstitusionál hodi reprezenta Estadu, ezerse asaun penál, asegura defeza ba menores, auzente no inkapáz, hanesan mos defende legalidade demokrátika no promove atu ema kumpre lei.
Xefe Estadu ne’e hateten katak, hadi’a infraestrutura fízika no teknolojia sei útil bainhira ita hatene oinsá uza hodi hasa’e servisu ho efetivu. Xefe Estadu mós salienta liután katak, prevensaun no kombate kriminalidade sai dezafiu boot no konstante ba Ministériu Públiku, Tribunál, Polísia no instituisaun seguransa sira ne’e hanesan mós ba defeza nasionál. Tanba ne’e, iha luta hasoru kriminalidade organizada no transnasionál, investigasaun kriminál tenke iha papél ne’ebé mak sa’e ba beibeik no presiza tebes. Servisu sira ne’e presiza hetan atensaun husi Governu no Ministériu Públiku, atu nune’e sai konsentradu, nia asaun sira multiplika no nia diresaun sai klaru no artikuladu.
“Ministériu Públiku halo tinan-20, konsolida-an hanesan instituisaun estadu nian. Maibé sempre hasoru nafatin dezafius mais kompleksu. Tanba Krime sira ne’ebé transnasionais no krime seluk ne’ebé barak. Nune’e, Ministériu Públiku tenke prepara-an nafatin ho operadór judisiais no polísia sira atu bele hasoru kriminialidade foun ne’ebé oras ne’e dadaun mundu enfrenta.
Iha sorin seluk, Prakuradór Jerál Repúblika Dr. Alfonso Lopez iha ninia diskursu hateten katak, MP ho infraestrutura ne’ebé kria ona ne’e nu’udar parte ida husi Dezenvolvimentu MP, ne’ebé sei akumula servisu espesializada ho kondisaun funsiona seguransa di’ak liután ba majistradu, ofisiál Justisa no funsionáriu apoiu tékniku sira hodi hala’o servisu.
Nune’e mós, importante servisu MP kontinua dezempeña ninia funsaun tuir konstituisaun hatuur ona no asume atuasaun propriu justisa ba sidadaun ne’ebé atividade penál barak hodi avalia sevisu efikasia iha sidadaun sira nia matan.
“Ho edifisiu ne’e bele mellora MP nia kapasidade efetivu, prezervasaun no rekolla prova sira, no koordena ho Polísia Orgaun Kriminál iha asuntu kriminál nian, hodi hasa’e kualidade servisu.
Nune’e, instalasaun edifisiu ne’e garantia kontabiliza, informátika, ba atuasaun kriminalidade organizadu tanba iha estatístika nasionál krimi organizadu sai tendénsia amesa ba nasaun. Ezersisiu asaun penál ba krime organizadu hanesan trafiku droga, brankeamentu kapitál, Korrupsaun no seluk tan.
PJR kompromete, Gabinete ne’e importante hodi reforsa atuasaun ho kualidade kombate krime organizadu. obra ne’e lokaliza iha PGR nia sorin, sei funsiona hanesan Gabinete Sentrál Kombate Korrupsaun no Kriminalidade Organizada no ida seluk mak Gabinete Kontensiozu Estadu, no Servisu espesializada rua ne’e funsiona dependénsia ba PGR.
Iha tinan-20219, Governu prevee orsamentu ba Prokuradória Jerál Repúblika iha kategoria kapitál dezenvolvimentu, obra ba Gabinete rua ne’e ho andar ida, harii iha rai metru kuadradu atus sia haatnulu resin-rua (942), ho ninia moru protesaun hale’u ho totál orsamentu hamutuk dólar amerikanu rihun atus neen hitu, atus ida haatnulu resin-rua, liu sentavus ualunulu resin ida ( $607.142,81) no obra ne’e konstrui husi kompañia lokál Bobolait.
Seremónia inagurasaun ne’e hetan partisipasaun husi Prezidente Repúblika, Francisco Guterres Lú-Olo, reprezentante Parlamentu Nasionál, Komisáriu Komisaun Anti-Korrupsaun ( CAC) Sergio Hornai, Adjuntu Provedór Direitu Umanu no Justisa (PDHJ), ba área boa governasaun José Telo Cristovão, Diretór Polísia Sientífika Investigasaun Kriminál (PCIC) Vicente Brito, inklui korpu diplomátiku no konvidadu sira seluk. (Media/MP)