DILI – Antes atu tama ba Eleisaun Prezidensiál no Parlamentár ne’ebé mak besik dadaun mai, Primeira Dama, Isabel da Costa Ferreira, enkontru ho Prokuradór-Jerál Repúblika (PJR), José da Costa Ximenes, atu konvida partisipasaun hosi Ministériu Públiku iha XXI Semináriu kona-ba Papél Sidadaun nian iha Dezenvolvimentu Bem Estár ho sub-tema Pás, Justisa no Toleránsia hodi bele konsolida Independénsia Nasionál, ne’ebé sei hala’o iha Sentru Konvensaun Dili, loron-9, fulan-fevereiru.
“Hanesan ita nia esperiénsia katak eleisaun sempre mosu iha violénsia no konflitu, maske ita hanoin katak ba eleisaun tinan ida ne’e sei la akontese, buat hotu la’o di’ak no pasífiku, mas ita labele haluhan katak dalaruma sira ne’ebé apoiu ba iha sira nia kandidatu dalaruma la liu ne’e halo sira triste no sira bele halo violénsia”, dehan Primeira Dama hafoin remata enkontru PJR iha edifísiu Prokuradoria Jerál Republika, Kolmera, iha Kuarta-feira (01/02/2017).
Primeira Dama mós halo komparasaun ho nasaun dezenvolvidu sira maske hetan ona independénsia kleur maibé konflitu mosu baibain, ho ida ne’e mak Primeira Dama nia gabinete, hamutuk ho Sentro Quesadhip Ruak, realiza semináriu refere hodi halo prevensaun antes atu tama ba períodu eleisaun iha Timór-Leste. Nia subliña liu tan katak partisipasaun Ministériu Públiku importante atu bele fahe informasaun ba públiku liu-liu kona-ba krime eleitorál sira. (Media PJR)