Suai-Segunda, loron-04, fulan- Marsu, tinan-2019, Prokuradór Distritál Suai Dr. José Elo, hala’o vizita kortézia ida ba Ospitál Nasionál Suai no PRADET hodi hametin kooperasaun.
Iha vizita ne’e ko’alia kona-ba kooperasaun instituisionál entre Ministériu Públiku (MP) ho Ospitál referál Suai no PRADET hodi haree ba kazu balun ne’ebé mak liga ba prosesu sira hanesan kazu Omesidu, Violénsia Domestika no Violénsia Seksuál.
Iha okaziaun ne’e, Prokuradór Distritál Suai, Dr. José Elo mós hato’o ba Reprezentante Diretór Jerál Ospitál Referal Suai nian katak, objetivu hosi vizita ida-ne’e mak ko’alia kona-ba relatóriu médiku ba pasiente sira ne’ebé mak sai vítima ba kazu sira hanesan Omesidu, Violénsia Doméstika, no Violénsia Seksuál tanba relatóriu médiku ne’e hanesan prova perisial ida atu bele konvense iha tribunal nune’e bele deside ba buat ne’ebé loos ou laloos ba aktu krime sira ne’e. Ho vizita ida-ne’e MP hakarak hametin liután servisu kooperasaun instituisionál nian iha futuru mai.
Prokuradór ne’e mós husu ba reprezentante Diretór Jerál Ospitál referál Suai nian, tenki kria kondisaun ida ne’ebé di’ak no óinsa halo atendimentu di’ak ba pasiente sira ne’ebé hetan problema sira hanesan kazu Omesidu, Violénsia Domestika, Violésina Seksuál, no kazu sira seluk, tenki fasilita sira ho di’ak atu nune’e vitima sira bele hetan relatóriu médiku ida ne’ebé di’ak no justu hodi haforsa sira nia sira problema ne’ebé sira infrenta.
Iha tempu hanesan Ekipa Prokuradoria Distritál Suai mós hala’o Vizita ba Psychosocial Recovery And Development In East Timor (PRADET) nian iha Munisípiu Covalima/Suai, hodi haree direita kondisaun vitíma sira nian.
Iha Vizita ne’e Dr. José Elo mós hato’o katak ami nia prezensa iha ne’e atu ko’alia kona-ba servisu kooperasaun entre MP ho PRADET hodi haree direita servisu atendimentu ba vitíma sira, liuliu kona-ba kazu sira hanesan Violénsia Seksuál ba menór, Violénsia Domestika, Violénsia sira hasoru ema ne’ebé ho Difisiente.
Prokuradór ne’e mós husu ba PRADET kuandu trata relatóriu vitíma sira nian tenke kredivel no justu, hodi nune’e servisu PRADET nian bele iha valór tanba ne’e mak PRADET tenke koidadu no haree didi’ak vítima sira, tanba vitíma sira presiza tebtebes ita boot sira nia tulun.
Tuir koordemadora (PRADET) Psychosocial Recovery and Development in East Timor Suai Imaculada Moreira dehan, PRADET kontinua fornese asisténsia no halo akompañamentu intensivu to’o vitíma sira hetan rekoperasaun no intrega fila fali ba família sira. Ho nune’e Kazu ne’ebé mak PRADET Suai rezistu hahu husi tinan-2012 to’o tinan-2019 ne’e hamutuk 489. Violénsia Seksuál ba menór, Violénsia Domestika, kazu abandona, no sira seluk tan.