Díli- Segunda, loron-07, fulan-Outubru, tinan-2019, Prokuradór Estadu Unidus J.Douglas Overbey hasoru malu ho Prokuradór Jerál Repúblika Dr. José da Costa Ximenes, iha Edifisiu Kolmera, Díli, Timor-Leste.

Iha vizita ne’e, PJR Dr. José da Costa Ximeneshato’o Benvindu ba  J. Douglas ho ninia komitiva ne’ebé mak hala’o vizita mai Eskritóriu Prokuradoria Jerál Repúblika Timor-Leste, “ori naran Prokuradoria Jerál Republika nian, ha’u apresia tebtebes, liuliu ba Sr. J. Douglas ne’ebé mak hatudu ona ninia interese no vontade hodi vizita ami-nia eskritoriu ne’e, no senti orgullu hodi simu ita-boot iha sala reuniaun KSMP nian”.

PJR  mós subliña tan katak; kooperasaun entre Ministériu Públiku no Embaixada Estadus Unidus nian iha Dili, Timor-Leste, hahú tiha ona desde tinan-2009 no durante tinan-10 kooperasaun ne’e, bele dehan katak liu porsentu 90 hosi ami-nia prokuradór sira hetan ona benefisiu ka rezultadu di’ak liuhosi kooperasaun ne’e, liuliu iha área kapasitasaun rekursu umanu no benefisiu ida-ne’e la’ós de’it ba prokuradór sira, maibé ba mós ofisiál justisa balun ne’ebé hetan ona rezultadu pozitivu.

Iha biban ne’e mós PJR hato’o katak; iha tinan ida-ne’e nia laran, MP rejista ona kuaze ema na’in-20 mak partisipa ona formasaun oioin iha rai-li’ur, hanesan iha Bangkok, Jakarta, Vietnam, no fatin seluk tan. Formasaun refere ne’e organiza hosi Embaixada Estadus Unidus nian iha Dili, Timor-Leste.

Ba futuru PJR  espera katak; kooperasaun no vizita ne’e la’ós ba dala ikus nian, maibé ida-ne’e hanesan dala uluk nian hodi kontinua nafatin servisu kooperasaun ne’e, ha’u espera katak kooperasaun entre Prokuradoria Jerál Repúblika TL, ho Embaixada Estadus Unidus nian iha Dili, Timor-Leste nu’udar fatór ida bé importante tebes.

PJR hato’o ba Prokuradór Estadu Unidos J.Douglas Overbey katak, iha Ministériu Públiku nia laran ezisti gabinete espesializadu tolu, hanesan; Gabinete Sentrál Kombate Korrupsaun no Kriminalidade Organizadu (GSKKKO) ne’ebé lidera hosi Dr. Aderito Tilman, gabinete ne’e rasik hetan supervizaun diretamente hosi Adjuntu Prokuradór Jerál, tuirmai mak Gabinete Kontensiozu Estadu no ikusliu mak Kuradoria menór no Familia ne’ebé lidera hosi Dr. Nelson de Carvalho, iha Prokuradoria Distritál Dili. Kuradoria menór no Familia ne’e rasik toma konta liuliu kona-ba asuntu violénsia doméstika no labarik ho idade ki’ik sira.

Iha sorin seluk, Prokuradór Estadu Unidos hato’o  katak, apresia tebes ho relasaun ne’ebé mak estabelese ona durante ne’e ho Ministériu Públiku (MP) no estadu TL nian. Partikularmente ha’u mós akompaña hela katak Sr. David Lowen mai ona hodi halo esforsu ruma no fornese tulun ba autoridade judisiál hanesan Juíz no Prokuradór sira. Aleinde ne’e ami apresia tebes ho membru ekipa MP nian ne’ebé mak ba vizita ona EUA, Distritu Tennessee parte Leste nian, iha tempu ne’eba di’ak tebes hodi halo diskusaun kona-ba asuntu sira ne’ebé interesante, ami troka opinaun ba malu no halo interesaun ho di’ak, no ita-boot ninia autoridade judisiál sira ne’e filafali ba Dili, Timor-Leste hodi bele haklaken fali buat ne’ebé sira hetan ona  ba nia belun sira.

Prokuradór Estadu Unidos akresenta katak, “Ha’u aseita no simu ita-boot ninia konvite atu kontinua halo interesaun ba malu hodi kontinua estabelese nafatin ita-nia amizade  ne’ebé di’ak liu tan”.(Media PJR)