Díli-Sesta, loron-28, fulan-Juñu, tinan-2019, Prokuradór Repúblika, Dr. Pascasio de Rosa Alves, partisipa iha serimónia aniversáriu (Autoridade Inspesaun no Fiskalizasaun ba Atividade Ekonómiku, Sanitáriu no Alimentár (AIFAESA-I.P) nian ba da-tolu iha Salaun Delta Nova, nune’e mós sai oradór ba semináriu ho tema, “Haforsa Sistema Kontrolu Nasionál iha Setór Ekonómiku no Siguransa Ai-han hodi Garante Direitu Konsumidór nian”. Iha semináriu ne’e, Dr. Pascasio aprezenta tema kona-ba “Prosesu kontra ordenasaun iha faze judisiál”

Iha ninia aprezentasaun hateten katak “Ministériu Públiku (MP) iha faze adminisrativu la halo intervensaun iha prosesu sira kontra ordenasionál sira iha faze ida-ne’e, tanba la kabe ba MP atu impulsiona prosesu nune’ee mós lahalo fiskalizasaun ba Autoridade Administrativu nia servisu liuliu hanesan AIFAESA, diferente iha Prosesu  Penál, iha ne’ebé MP mak nain ba asaun penál entaun nia (MP) mak iha kompeténsia atu dirije investigasaun no promove asaun penál, nune’e mós prossu kontra ordenasionál ne’ebé entidade administrativa prátika ne’e, ikus mai tenki termina ho desizaun final hanesan arkivu ka aplika sansaun”.

Nia hateten liután katak, “prosesu kontra ordenasionál ne’e atu to’o iha faze judisiál, bele liu husi forma rua, mak hanesan; Rekursu Administrativu ho asaun ezekusaun, tanba entidade administrativu ne’e kondena infratór sira ho sansaun koima/pekuniaria ou sansaun asesoria sira, nune’e mós infratór sira ne’ebé diskorda ba iha desizaun kondenatóriu ne’e, sira iha direitu atu interpór rekursu impugnasaun ba aktu ou desizaun administrativu”

Oradór ne’e realsa tan katak “normalmente no teorikamente rekursu impugnasaun ne’ebé aprezenta husi rekorrente, tenki aprezenta diretamente ba iha Autoridade Administrativu ne’ebé aplika koima ne’e, hafoin mak Entidade Administrativu haruka aktu sira ne’e ba MP, iha momentu ida neeé mós, Entidade Administrativu iha possibilidade bele revoga tiha sansaun koima ne’ebé aplika tiha ona, entretantu, wainhira autu sira ne’e to’o iha MP nia liman ona, entaun buat ne’ebé mak MP halo mak sei apresia fila fali kestaun balun ne’ebé persiza haree ka husu ba Entidade Administrativu sei karik iha elementu sira balun ne’ebé persiza entrega”. Iha biban ne’e mós nia solisita tán katak, “buat ida ne’ebé sei falta iha ita-nia ordenamentu Jurídiku Timor-Leste iha âmbitu kontra ordenasionál mak ita seidauk iha Rejime Jerál kona-ba kontra ordenasionál no koima, tanba ne’e prátika ne’ebé la’o durante ne’e mak wainhira rekorente ida interpór rekursu adminstrativu ba iha Tribunál, tuirmai, Tribunál sei manda notifikasaun ba Entidade ne’ebé prátika autu, atu kontradizer ka (kontesta) saída mak rekorrente ne’e hato’o iha nia rekursu, hafoin mak Entidade refere remete autu sira prosesu kontraordenasionál nian ba MP”, (Media PJR).