Servisu Kontensiozu Estadu nian

Servisu Kontensiozu Estadu nian (SKE) nu’udar servisu sentrál Ministériu Públiku nian ne’ebé responsável iha área intervensaun no defeza ba interese sira Estadu nian iha área sivil, administrativa, fiskál no kontas. Departamentu ne’e funsiona iha Prokuradoria Jerál Repúblika, ho kompeténsia iha nível nasionál. Servisu ne’e harii tiha liu hosi Sirkular n.° 04/PJR/2013, loron-3, fulan-outubru, ne’ebé estabelese mós nia kompeténsia sira mak hanesan: reprezenta no defende interese Estadu nian iha Tribunál sira; kordena, dirije no ezekuta intervensaun MP nian iha matéria sível, administrativa, fiskál no kontas ne’ebé Estadu sai nu’udar parte, promove ezekusaun ba desizaun judisiál sira atu iha lejitimidade; no akompaña kompozisaun extrajudisiál konflitu interese nian ne’ebé Estadu sai nu’udar parte. SKE funsiona iha dependénsia ierárkika direta Adjunta Prokuradór-Jerál Repúblika nian, Zélia Trindade, ho atuasaun iha nível nasionál, no ninia kriasaun garante uniformidade ba prosedimentu, kumprimentu rigorozu ba prazu sira,  hasa’e efikásia atuasaun MP nian no mós  promove espesializasaun majistradu sira-nian. Hanesan área ida ne’ebé kompleksu liu no multidisiplinár, ninia majistradu sira na’in rua ne’ebé koloka iha ne’ebá konta ho asesoria internasionál espesializada iha prosesu kapasitasaun iha ezersísiu funsaun sira.