Dili-Loron-16, fulan-Janeiru, tinan-2020, Prokuradór-Jerál Repúblika (PJR), Dr. José da Costa Ximenes hamutuk ho nia Adjuntu Dr. Alfonso Lopez, hato’o relatóriu servisu MP nian durante tinan-2019 ba Prezidente Repúblika, Francisco Guteres Lú-Olo, iha Palasiu Prezidente Bairupite
“Ami-nia enkontru ohin ne’e hanesan enkontru mensál nian, hodi pasa informasaun ba PR kona-ba atividade Ministériu Públiku ninian durante tinan 2019, Ministériu Públiku (MP) rejista kazu krimi iha teritóriu Nasionál Timor-Leste ho totál prosesu rihun haat, atus sia, ualunu resin ualu (4.988)”
Iha enkontru ne’e PJR hato’o mós informasaun annual relasionadu ho prosesu entrada katak “iha Prokuradoria Distritál Dili (PDD) rejista prosesu rihun rua, atus hitu ualunulu resin ualu (2.788), iha Prokuradoria Distritál Baucau (PDB) rejista prosesu atus ualu, sanulu resin rua (812), iha Prokuradoria Distritál Suai (PDS) rejista prosesu atus hitu, haatnulu resin ualu (748) no iha Prokuradoria Distritál Oecusse (PDO) rejista prosesu atus tolu sianulu resin ida (391), no mós iha Gabinete Kombate Korrupsaun no Kriminalidade Organizada rejista prosesu atus rua, hatnulu resin sia (249).
PJR akresenta tan katak, “hosi prosesu ne’ebé rejista hamutuk 4.988 ne’e, iha nivel Nasionál MP konsege termina prosesu hamutuk rihun lima neennulu, (5.060) mak hanesan tuirmai; iha PDD termina prosesu rihun rua, atus sia, ualunulu resin rua (2.982), iha PDB termina prosesu atus ualu haatnulu resin lima (845), iha PDS termina prosesu atus hitu sanulu resin lima (715), no iha Oecusse termina ona prosesu atus rua sianulu resin sia (299) no iha Gabinete Kombate Korrupsaun no Kriminalidade Organizada termina prosesu atus rua sanulu resin sia (219), ho nune’e ita redus prosesu hamutuk 72 iha nivél nasionál, ida-ne’e la inklui julgamentu sira ne’ebé ita-nia kuadru MP sira partisipa hanesan, primeiru interogatóriu judisiál ne’ebé ita halo no mós julgamentu sumáriu sira”. Iha Gabinete Kombate Korrupsaun no Kriminalidade Organizada, rejista kazu ne’ebé tama hamutuk prosesu atus rua haatnulu resin sia (249), hosi númeru ne’e ita finaliza prosesu, atus rua sanulu resin sia (219) kazu ho númeru ne’e konta ho kazu korrupsaun hamutuk prosesu 105 mak tama no krimi organizadu hamutuk prosesu 144 ho totál prosesu atus rua sanulu resin sia (219) mak tama, kazu korrupsaun ita akuza ona prosesu hamutuk 52, krimi organizadu ita halo ona akuzasaun ba prosesu hamutuk 93, no kazu korrupsaun ita arkiva prosesu 32 tanba laiha prova no evidénsia forte, krimi organizadu sira seluk ita arkiva prosesu 38, ida-ne’e mak informasuan anuál ne’ebé ha’u bele ko’alia, no informasaun kompletu hein to’o bainhira hato’o am-nia relatóriu anuál iha PN”.
Iha sorin seluk, PJR mós hateten liután katak “kazu sira ne’ebé tama iha 20 Dezembru 2019 to’o 05 Janeiru 2020 ne’e krimi barak liu mak akontese iha juridisaun Baucau nian, ita konsege hatama ba prizaun preventiva ema na’in-8, ba krimi arma branka, krimi omisídiu ida iha Lospalos, no krimi danu ho violénsia ne’ebé akontese iha Laga-Baucau nian, ne’ebé, MP promove ema na’in-4 ba prizaun preventiva no na’in-12 mak aprezentasaun periódika, iha Dili mak krimi tentativa omisídiu ba Membru F-FDTL ida iha tasitolu, ne’ebé hatama ona suspeitu ba prizaun preventiva, nune’e mós iha Oecusse, iha krimi omisídiu ida no suspeitu ne’e mós ba hotu prizaun preventiva” (Media PJR).